فیصل آباد: مچلکے جمع نہ کرائے، ملزم جیل چلا گیا

اہم نکات:

عدالت نے کوہ نور سیلز گرل تشدد کیس کے ملزم کی 50 ہزار روپے کے ضمانتی مچلکوں کے عوض ضمانت منظور کر لی
تفتیشی افسر نے ملزم کے 14 روزہ جوڈیشل ریمانڈ کی استدعا کی تھی
عدالت نے حکم دیا کہ مچلکے اور شخصی ضمانت جمع نہ ہونے پر ملزم کو جوڈیشل لاک اپ بھجوا دیا جائے
مچلکے جمع نہ کرانے پر ملزم کو جیل منتقل کر دیا گیا، دوبارہ پیشی 24 نومبر کو ہوگی

فیصل آباد: تھانہ مدینہ ٹاؤن سیلز گرل کیس کا ملزم مچلکے جمع نہ کرانے پر جیل چلا گیا۔

پولیس کے مطابق تھانہ مدینہ ٹاؤن میں درج مقدمے میں گرفتار ملزم حامد کو جوڈیشل مجسٹریٹ راؤ اعجاز احمد کی عدالت میں پیش کیا گیا۔

تفتیشی افسر نے عدالت سے ملزم کے 14 روزہ جوڈیشل ریمانڈ کی استدعا کی۔

عدالت نے 50 ہزار روپے کے ضمانتی مچلکوں کے عوض ملزم کی ضمانت منظور کر لی۔

عدالت نے حکم دیا کہ مچلکے اور شخصی ضمانت جمع نہ کرانے کی صورت میں ملزم کو جوڈیشل لاک اپ بھجوا دیا جائے۔ ملزم کی دوبارہ پیشی 24 نومبر کو مقرر کی گئی۔

ترجمان نے بتایا کہ ضمانتی مچلکے جمع نہ کرانے پر ملزم کو جیل منتقل کر دیا گیا۔

یہ مقدمہ کوہ نور کے علاقے میں خواتین کے ملبوسات کی دکان پر پیش آنے والے واقعے کا ہے، جہاں ملزم نے بحث کے دوران سیلز گرل کو تھپڑ مارا اور تشدد کر کے زمین پر گرا دیا تھا۔

واقعے کی ویڈیو سوشل میڈیا پر وائرل ہونے کے بعد پولیس نے مقدمہ درج کر کے ملزم کو گرفتار کیا تھا۔ سی پی او فیصل آباد نے نوٹس لیا تو سب انسپکٹر زبیر نے ملزم کو ایک گھنٹے میں گرفتار کر لیا تھا۔