گلاب سے سمجھایا: ہیلمٹ ہی زندگی ہے

اہم نکات:

سٹی ٹریفک پولیس اور گورنمنٹ کالج یونیورسٹی کا مشترکہ روڈ سیفٹی کیمپ اور آگاہی واک
ہیلمٹ پہن کر موٹر سائیکل چلانے والوں کو طلبہ نے گلاب کے پھول پیش کیے
چیف ٹریفک آفیسر کے مطابق ہیلمٹ جان کے تحفظ کے لیے انتہائی ضروری ہے
کیمپ کا مقصد نوجوانوں میں ٹریفک قوانین کی پاسداری کا شعور اجاگر کرنا تھا

فیصل آباد: سٹی ٹریفک پولیس اور گورنمنٹ کالج یونیورسٹی کے طلبہ سڑکوں پر نکل آئے۔ انھوں نے ہیلمٹ پہن کر موٹر سائیکل چلانے والوں کو گلاب پیش کیے۔

سرکاری ہینڈ آؤٹ کے مطابق، چیف ٹریفک آفیسر فیصل آباد ناصر جاوید رانا نے تقریب میں بطور مہمانِ خصوصی شرکت کی۔

ہینڈ آؤٹ میں بتایا گیا کہ شعبہ ابلاغِ عامہ کی سربراہ ڈاکٹر سلمیٰ امبر، دیگر فیکلٹی ممبران اور طلبہ و طالبات بھی تقریب میں شریک ہوئے۔

پریس ریلیز کے مطابق، تقریب کے دوران خصوصی طور پر روز شو کا اہتمام کیا گیا، جس میں طلبہ و طالبات نے ہیلمٹ پہن کر موٹر سائیکل چلانے والے شہریوں کو گلاب کے پھول پیش کیے اور انھیں ہیلمٹ کے استعمال کی اہمیت سے آگاہ کیا۔

گورنمنٹ کالج یونیورسٹی فیصل آباد میں روڈ سیفٹی کیمپ کے بینر کے سامنے طلبہ و طالبات اور اساتذہ

چیف ٹریفک آفیسر ناصر جاوید رانا فیصل آباد میں روڈ سیفٹی کیمپ میں میڈیا سے گفتگو کرتے ہوئے

فیصل آباد روڈ سیفٹی کیمپ میں چیف ٹریفک آفیسر طلبہ و اساتذہ کے ساتھ بیٹھے ہیں

فیصل آباد روڈ سیفٹی کیمپ میں ٹریفک پولیس افسران اور یونیورسٹی طلبہ کا گروپ فوٹو

فیصل آباد روڈ سیفٹی کیمپ میں چیف ٹریفک آفیسر کے ساتھ ٹریفک پولیس کی جیکٹیں پہنے طلبہ

چیف ٹریفک آفیسر ناصر جاوید رانا نے اس موقع پر کہا کہ ہیلمٹ کا استعمال موٹر سائیکل سواروں کی جان کے تحفظ کے لیے انتہائی ضروری ہے۔ ان کا کہنا تھا کہ ٹریفک قوانین کی پابندی کر کے حادثات سے بچا جا سکتا ہے۔

ہینڈ آؤٹ کے مطابق، تقریب کا مقصد نوجوان نسل اور شہریوں میں ٹریفک قوانین کی پاسداری، ہیلمٹ کے لازمی استعمال اور محفوظ ڈرائیونگ کے حوالے سے شعور اجاگر کرنا تھا۔

تقریب کی ویڈیوز

ڈاکٹر سلمیٰ امبر نے کہا کہ اس مہم کا نام «صبر، محفوظ سفر» رکھا گیا، کیونکہ اس کا اصل سبق صبر تھا۔

ان کا کہنا تھا کہ کلاس میں کیے گئے ایک تجربے میں طلبہ نے پایا کہ ہر بحران اختلاف سے شروع ہوتا ہے۔ ابتدائی دو منٹ کا صبر اس اختلاف کو تشدد میں بدلنے سے روک سکتا ہے۔

شعبہ ابلاغ عامہ کی سربراہ کے مطابق یہ مہم شعبے کے مضمون «کنفلکٹ اینڈ کرائسز کمیونیکیشن» کا عملی حصہ تھی اور طلبہ کے کورس ورک میں شامل تھی۔

ڈاکٹر سلمیٰ امبر نے بتایا کہ اس مضمون میں طلبہ کو یہ سکھایا جاتا ہے کہ تنازعہ تشدد میں بدلے بغیر کس طرح نمٹا جائے۔ انھیں برداشت پیدا کرنا اور بحران میں پرسکون رہنا بھی سکھایا جاتا ہے۔

ان کے بقول ڈرائیونگ اور ٹریفک کا صبر سے گہرا تعلق ہے۔ زیادہ تر سڑک حادثات بے صبری اور عدم برداشت کی وجہ سے پیش آتے ہیں۔

ڈاکٹر سلمیٰ امبر نے کہا کہ پھول اسی لیے منتخب کیے گئے کہ یہ محبت، امن اور برداشت کی علامت ہیں اور لینے والے کو خوشی دیتے ہیں۔

یہ پھول انہی سواروں کو پیش کیے گئے جنھوں نے ہیلمٹ پہنا تھا اور ٹریفک قوانین کی پابندی کی تھی۔

ان کے مطابق اس مہم کا مقصد عوام کی خوشی اور ایک مہذب و تعمیری معاشرے کی تعمیر تھا۔