لاہور: ہر تھانے کا کرائم ڈیٹا اب ایک کلک پر

اہم نکات:

وزیر اعلی مریم نواز شریف نے لاہور میں کرائم سرویلنس یونٹ کا باقاعدہ افتتاح کر دیا
پنجاب کے ہر تھانے کے جرائم کا تازہ ترین ڈیٹا ایک کلک پر دستیاب ہوگا
یونٹ میں 20 کیٹیگریز کے جرائم کا ڈیٹا مرتب کیا جائے گا
ڈی پی اوز، ڈی ایس پیز اور ایس ایچ اوز کی کارکردگی کا تجزیہ بھی کیا جائے گا
وزیر اعلی نے ایف آئی آر کے اندراج میں بلاجواز تاخیر کی شکایات پر ناپسندیدگی کا اظہار کیا
وزیر اعلی نے عدالتی فیس جعل سازی کے خلاف کارروائی پر چیف جسٹس لاہور ہائی کورٹ کو خراجِ تحسین بھی پیش کیا

پنجاب بھر کے تھانوں کے جرائم کا تازہ ترین ڈیٹا اب ایک کلک پر سامنے آئے گا۔

وزیر اعلی مریم نواز شریف نے کرائم سرویلنس یونٹ کا باقاعدہ افتتاح کر دیا۔ یونٹ کے سربراہ عثمان تنویر نے وزیر اعلی کو یونٹ کے نظام پر تفصیلی بریفنگ دی۔

یونٹ ضلع، سرکل اور تھانے کی سطح پر سمارٹ پولیسنگ کا نظام چلائے گا، اور ڈی پی او، ڈی ایس پی اور ایس ایچ او کی سطح پر ڈیجیٹل نگرانی ہوگی۔

کرائم سرویلنس یونٹ آمد پر وزیر اعلی مریم نواز شریف کو پھول پیش کیے جا رہے ہیں

وزیر اعلی مریم نواز شریف کرائم سرویلنس یونٹ میں بریفنگ سے خطاب کر رہی ہیں

کرائم سرویلنس یونٹ کے کنٹرول روم میں اہلکار اپنے ڈیسک پر کام کر رہے ہیں

یونٹ کے سربراہ عثمان تنویر وزیر اعلی کو بریفنگ دے رہے ہیں

یونٹ میں 20 کیٹیگریز کے جرائم کا ڈیٹا مرتب کیا جائے گا۔ یونٹ میں تعینات ماہرین فوری ڈیٹا اینالیسس رپورٹس تیار کریں گے۔

ڈی پی اوز، ڈی ایس پیز اور ایس ایچ اوز سمیت پولیس افسران کی کارکردگی کا تجزیہ بھی اسی نظام کے ذریعے کیا جائے گا۔

ہر شہری کی شکایت یا درخواست کا بروقت ازالہ ممکن ہوگا۔ تاخیر کی صورت میں کارروائی بھی ممکن ہوگی۔

بیان کے مطابق، یونٹ سوشل میڈیا پر قومی سلامتی کے تقاضوں کے مطابق پوسٹس کی نشاندہی بھی کرے گا۔

اچھے برے لوگ ہر جگہ ہوتے ہیں لیکن پوری فورس پر تنقید درست طرزِ عمل نہیں ہے

وزیر اعلی نے آئی جی پنجاب پولیس سے پولیس اصلاحات کا پلان طلب کر لیا ہے۔ انھوں نے پولیس سٹیشن ریکارڈ مینجمنٹ کے ڈیٹا کے درست استعمال کو یقینی بنانے کا حکم بھی دیا۔

وزیر اعلی نے ایف آئی آر کے اندراج میں بلاجواز تاخیر کی شکایات پر ناپسندیدگی کا اظہار کیا۔ انھوں نے پولیس کے خلاف منفی پروپیگنڈے پر فوری رسپانس کی ہدایت بھی کی۔

وزیر اعلی نے کہا کہ ہم پنجاب کو ہر قسم کے جرائم سے پاک کرنا چاہتے ہیں۔ ان کا کہنا تھا کہ کرائم سرویلنس یونٹ کے قیام کا مقصد جرائم کے خاتمے کی مہم کو موثر بنانا ہے۔

انھوں نے کہا کہ چند لوگوں کی وجہ سے پولیس کی مجموعی کارکردگی پر سوالیہ نشان اٹھانا غلط ہے۔ ان کے مطابق، موثر اصلاحات کی وجہ سے پنجاب میں جرائم کی شرح میں کمی کا تاریخی رجحان خوش آئند ہے۔

عدالتی فیس جعل سازی: چیف جسٹس کو خراجِ تحسین

وزیر اعلی مریم نواز شریف نے عدالتی فیس جعل سازی میں ملوث مافیا کے خلاف کارروائی پر چیف جسٹس لاہور ہائی کورٹ کو خراجِ تحسین پیش کیا ہے۔

انھوں نے جعلی عدالتی فیس ٹکٹوں کے ذریعے قومی خزانے کو ڈیڑھ ارب روپے کا نقصان پہنچانے والے عناصر کے خلاف کارروائی پر اطمینان کا اظہار کیا۔ ان کا کہنا تھا کہ قومی خزانے کو نقصان پہنچانے والے مافیا درحقیقت قومی مجرم ہیں۔

وزیر اعلی نے کہا کہ بدعنوانی اور جرائم کے خلاف عدلیہ اور انتظامیہ کا ایک پیج پر ہونا بہتری کی نوید ہے۔ انھوں نے پنجاب میں بدعنوانی کے خاتمے کی کوشش میں چیف جسٹس لاہور ہائی کورٹ کے تعاون پر شکریہ بھی ادا کیا۔