فیصل آباد: آئی ایل او وفد سوشل سکیورٹی ہسپتال کی صفائی سے متاثر

اہم نکات:

آئی ایل او پاکستان کے کنٹری ڈائریکٹر گیئر تھامس ٹونسٹول نے لیبر رہنماؤں کے ہمراہ سوشل سکیورٹی ہسپتال مدینہ ٹاؤن کا دورہ کیا۔
وفد نے پودا لگا کر شجر کاری مہم کا افتتاح کیا، مریضوں سے ملاقات کی اور کارڈیالوجی و سی سی یو وارڈ، ڈائیلسز سینٹر اور ایم این سی ایچ نرسری کا معائنہ کیا۔
ٹونسٹول نے ہسپتال کی صفائی ستھرائی اور پرسکون ماحول کی تعریف کرتے ہوئے دوبارہ دورے کا وعدہ کیا۔
سی پی سی ہال میں منعقدہ تقریب میں ٹونسٹول اور اسد چوہدری کو شیلڈز پیش کی گئیں۔

آئی ایل او کے کنٹری ڈائریکٹر گیئر تھامس ٹونسٹول نے سوشل سکیورٹی ہسپتال مدینہ ٹاؤن کا دورہ کیا۔

ہینڈ آؤٹ کے مطابق وفد میں آئی ایل او گورننگ باڈی کے رکن و سیکرٹری جنرل پاکستان یونائیٹڈ ورکرز فیڈریشن چوہدری سعد محمد اور دیگر لیبر رہنما شامل تھے۔

ہینڈ آؤٹ میں کہا گیا ہے کہ میڈیکل سپرنٹنڈنٹ ڈاکٹر عبدالرؤف شیخ اور ایڈیشنل میڈیکل سپرنٹنڈنٹ ڈاکٹر سنبل صابر نے وفد کا استقبال کیا۔

بیان کے مطابق ٹونسٹول اور چوہدری سعد محمد نے ہسپتال کے احاطے میں پودا لگا کر شجر کاری مہم کا افتتاح کیا۔

وفد نے رسیپشن ایریا میں زیرِ علاج مریضوں سے ملاقات کی اور طبی سہولیات کے بارے میں ان سے گفتگو کی۔

ہینڈ آؤٹ میں بتایا گیا ہے کہ وفد نے کارڈیالوجی و سی سی یو وارڈ، ڈائیلسز سینٹر اور ایم این سی ایچ نرسری کا معائنہ کر کے سہولیات کا تفصیلی جائزہ لیا۔

اس موقع پر ڈاکٹر محمد احسان، ڈپٹی میڈیکل سپرنٹنڈنٹ (ایڈمن) ڈاکٹر ذیشان محمد علی، ڈاکٹر عبدالرحمٰن، ڈاکٹر کاشف نوید، سوشل سکیورٹی ڈائریکٹوریٹ کے ڈائریکٹرز اور لیبر رہنما میاں رب نواز وٹو بھی موجود تھے۔

معائنے کے بعد سی پی سی ہال میں تقریب منعقد ہوئی، جہاں ہسپتال کی کارکردگی اور شعبہ جات پر تفصیلی پریزنٹیشن پیش کی گئی۔

فیصل آباد: دل کے مریض ایک ہی مشین کے رحم و کرم پر

تقریب سے خطاب کرتے ہوئے ٹونسٹول نے ہسپتال انتظامیہ اور ان کی ٹیم کی محنت کو سراہا اور صفائی ستھرائی کے اعلیٰ معیار اور پرسکون ماحول کی خاص طور پر تعریف کی۔

انھوں نے کہا کہ پیسی کے ہسپتالوں کا دورہ کر کے انھیں انتہائی مسرت ہوئی اور وہ جب بھی دوبارہ پاکستان آئیں گے تو اس ہسپتال کا دورہ ضرور کریں گے۔