ایل پی جی کی قیمتیں آسمان پر پہنچانے کا الزام، جماعت اسلامی کا کریک ڈاؤن کا مطالبہ

اہم نکات:

جماعت اسلامی کے فیصل آباد کے ضلعی امیر نے ایل پی جی کی بلیک مارکیٹنگ اور قیمتوں میں خودساختہ ہوشربا اضافے کی شدید مذمت کی ہے۔
ان کا کہنا ہے کہ مافیا مصنوعی قلت پیدا کر کے من مانے نرخ وصول کر رہا ہے۔
انھوں نے کہا ہے کہ ایل پی جی ہر گھر کی بنیادی ضرورت بن چکی ہے، مگر ذخیرہ اندوز قیمتیں آسمان پر پہنچا رہے ہیں۔
انھوں نے ایل پی جی مافیا کے خلاف فوری کریک ڈاؤن، سرکاری نرخوں پر عملدرآمد اور ذخیرہ اندوزوں کے لیے عبرتناک سزاؤں کا مطالبہ کیا ہے۔

ایل پی جی کی مبینہ بلیک مارکیٹنگ نے گیس ہر گھر کے لیے مہنگی کر دی ہے۔

جماعت اسلامی کے ہینڈ آؤٹ کے مطابق، پارٹی کے فیصل آباد کے ضلعی امیر میاں طاہر ایوب نے ایل پی جی کی بلیک مارکیٹنگ اور قیمتوں میں خودساختہ ہوشربا اضافے کی شدید مذمت کی ہے۔

انھوں نے کہا ہے کہ ایل پی جی مافیا مصنوعی قلت پیدا کر کے من مانے نرخ وصول کر رہا ہے اور عوام کی جیبوں پر دن دہاڑے ڈاکہ ڈال رہا ہے۔

انھوں نے مزید کہا ہے کہ صوبائی حکومت کی کارکردگی صرف اشتہارات اور ٹک ٹاک تک محدود ہو کر رہ گئی ہے۔

ان کے بقول، عوام کو دو وقت کی روٹی میسر نہیں، مگر وزیراعلیٰ کی تشہیر پر قومی خزانہ بے دریغ خرچ ہو رہا ہے۔

فیصل آباد: لیوی خاتمے میں ٹال مٹول، جماعت اسلامی کی حکومت کو وارننگ

ان کا کہنا ہے کہ ایل پی جی کی کھلے عام بلیک مارکیٹنگ اور ناجائز منافع خوری نے عوام کی زندگی اجیرن بنا دی ہے۔

انھوں نے مؤقف اختیار کیا کہ مافیا سرکاری نرخوں کو جوتی کی نوک پر رکھتے ہوئے من مانے ریٹ وصول کر رہا ہے اور یہ صورتحال حکومتی رٹ پر سوالیہ نشان ہے۔ ان کے بقول، یہ غریب عوام کے ساتھ کھلی ناانصافی ہے۔

ایل پی جی مافیا مصنوعی قلت پیدا کر کے من مانے نرخ وصول کر رہا ہے اور عوام کی جیبوں پر دن دہاڑے ڈاکہ ڈال رہا ہے۔

انھوں نے کہا ہے کہ غریب اور متوسط طبقہ پہلے ہی مہنگائی کے بوجھ تلے دبا ہوا ہے اور بنیادی ضرورت کے حصول کے لیے بھی ذلیل و خوار ہو رہا ہے۔

ان کا کہنا ہے کہ حکومتی دعوے محض بیانات تک محدود ہو کر رہ گئے ہیں اور انتظامیہ کی مجرمانہ خاموشی نے عوام کا جینا دوبھر کر دیا ہے۔

انھوں نے کہا ہے کہ ایل پی جی ہر گھر کی بنیادی ضرورت بن چکی ہے، مگر ذخیرہ اندوز عناصر مصنوعی قلت پیدا کر کے قیمتوں کو آسمان پر پہنچا رہے ہیں اور عوام مہنگے داموں گیس خریدنے پر مجبور ہیں۔

انھوں نے مطالبہ کیا ہے کہ ریاست اپنی ذمہ داری پوری کرتے ہوئے ایل پی جی مافیا کے خلاف فوری اور فیصلہ کن کریک ڈاؤن شروع کرے، سرکاری نرخوں پر عملدرآمد یقینی بنایا جائے اور ذخیرہ اندوزوں کو عبرتناک سزائیں دی جائیں۔

انھوں نے خبردار کیا ہے کہ بصورت دیگر عوام سڑکوں پر آنے پر مجبور ہوں گے اور اس کی تمام تر ذمہ داری حکومت اور متعلقہ اداروں پر عائد ہوگی۔

Read in English