فیصل آباد: جدید ٹیکنالوجی سے چور ٹریس، 36 لاکھ سے زائد کے زیورات برآمد

اہم نکات:

تھانہ ملت ٹاؤن پولیس نے جدید ٹیکنالوجی کی مدد سے ملزم اویس کو گرفتار کر لیا
شادی کی تقریب کے دوران سٹیج سے زیورات والا بیگ چوری ہوا تھا
ملزم کے قبضے سے 36 لاکھ 50 ہزار روپے مالیت کا طلائی سیٹ برآمد ہوا
سی پی او تنویر حسین نے زیورات کینیڈین شہری طارق اکرام کے حوالے کیے

فیصل آباد: تھانہ ملت ٹاؤن پولیس نے کینیڈین شہری کے چوری شدہ زیورات برآمد کر لیے۔

پولیس ہینڈ آؤٹ کے مطابق ایس ایچ او ملت ٹاؤن علی اکبر نے جدید ٹیکنالوجی کی مدد سے ملزم اویس کو گرفتار کیا۔

ہینڈ آؤٹ میں بتایا گیا ہے کہ ملزم کے قبضے سے چوری شدہ طلائی سیٹ بھی برآمد کر لیا گیا۔

سی پی او فیصل آباد کینیڈین شہری طارق اکرام سے مصافحہ کر رہے ہیں

سی پی او فیصل آباد برآمد شدہ زیورات واپس کر رہے ہیں، ایس ایچ او ملت ٹاؤن علی اکبر بھی موجود ہیں

ترجمان فیصل آباد پولیس کے مطابق سی پی او تنویر حسین نے برآمد شدہ زیورات ان کے مالک کینیڈین شہری طارق اکرام کے حوالے کیے۔

ابتدائی اطلاعی رپورٹ کے مطابق طارق اکرام نے پولیس کو بتایا کہ 7 نومبر کی رات تقریباً 8 بجے بلے دی جھل، شیخوپورہ روڈ پر ان کی بیٹی کی شادی کی تقریب میں مہمانوں کی آمد شروع ہو گئی تھی۔

رپورٹ کے مطابق تقریب کے دوران سٹیج سے طلائی سیٹ والا بیگ کسی نے چرا لیا تھا۔

رپورٹ میں مزید درج ہے کہ مقدمہ تھانہ ملت ٹاؤن میں دفعہ 380 تعزیرات پاکستان کے تحت نامعلوم ملزمان کے خلاف درج کیا گیا۔

PDFابتدائی اطلاعی رپورٹ 1903/26، تھانہ ملت ٹاؤن